Акафист женам мироносицам 11

Пе́ние А́нгельское и глаго́лы челове́ческия воспева́ют Па́сху всепра́зднственную, в не́йже и сама́ тва́рь свободи́ся от рабо́ты нетле́ния в свобо́ду сла́вы ча́д Бо́жиих. Мы́ же ку́пно с жена́ми мироно́сицами вопие́м Христу́: Аллилу́иа.
Светоза́рная сия́ и спаси́тельная но́щь провозвещена́ е́сть жена́ми мироно́сицами, я́же ни свети́льника, ниже́ со́лнечнаго све́та тре́бует, я́ко Са́м Госпо́дь просвеща́ет ю́. Мы́ же, словеса́ ва́ша в сердца́х содержа́ще, велича́ем ва́с си́це:

Ра́дуйтеся, Христа́ пла́менне возлюби́вшия; ра́дуйтеся, бу́ии о Бо́зе пред апо́столы я́вльшияся.
Ра́дуйтеся, Го́спода Иису́са в ве́це се́м не постыди́вшияся; ра́дуйтеся, Спаси́телем пред А́нгелы Его́ испове́данныя.
Ра́дуйтеся, сады́ сенноли́ственныя, Отце́м Небе́сным насажде́нныя; ра́дуйтеся, ро́ждие пресла́дкое Лозы́ Безсме́ртныя.
Ра́дуйтеся, зе́рна гору́шныя, Ца́рство Бо́жие ре́вностно возрасти́вшия; ра́дуйтеся, кри́ны се́льныя и древеса́ светлоплодови́тыя.
Ра́дуйтеся, свети́льницы всено́щныя, Ду́ха не угаса́ющия; ра́дуйтеся, моле́ния, я́ко фимиа́м кади́льный принося́щия.
Ра́дуйтеся, ру́це своя́ преподо́бныя к Бо́гу всегда́ воздева́ющия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.